Qubada bibisini öldürməkdə təqsirləndirilən şəxs məhkəmə hökmü barəsindən kassasiya şikayəti verib. Bu haqda ShimalNews 22 fevral tarixində Pravda.az-a istinadən məlumat verir.
Məlumata görə, hakim Ələsgər Novruzovun sədrliyi ilə keçirilən prosesdə təqsirləndirilən Mişi Migirovun anket məlumatları dəqiqləşdirilib. Növbəti hazırlıq iclası fevralın 28-nə təyin edilib.
Hadisə 2018-ci ildə baş verib. Qırmızı Qəsəbə sakini M.Migirov qohumlarının məzarlarını ziyarət etmək adı ilə 87 yaşlı bibisi Şuşan Sumxayevanı qəbiristanlığa aparıb. Orada qadın həmin şəxs tərəfindən döyülüb və ertəsi gün xəstəxanada dünyasını dəyişib.
M.Migirov zorlama və qəsdən adam öldürmə maddəsi ilə ittiham edilib. Bakı Ağır Cinayətlər Məhkəməsinin hökmü ilə o, 19 il müddətinə azadlıqdan məhrum edilib. Hökmdən narazı qalan məhkum apellyasiya şikayəti verib. Sumqayıt Apellyasiya Məhkəməsi onun cəzasını 17 ilə endirib.
Daha sonra dövlət ittihamçısı kassasiya protesti verib. Ali Məhkəmə isə Sumqayıt Apellyasiya Məhkəməsinin çıxardığı qərarı ləğv edib və birinci məhkəmənin çıxardığı hökm qüvvədə saxlanılıb.
Eləcə də məlum olub ki, M.Migirov 2006-cı ildə Rusiyanın Ulyanovsk şəhərində qəsdən adam öldürdüyünə görə 9 il 6 ay cəza çəkib. Sonra onu Azərbaycana deportasiya ediblər.
Doğma qəsəbəsində M.Migirov spirtli içki aludəçisi olduğundan sərxoş vəziyyətdə bir neçə dəfə inzibati məsuliyyətə cəlb olunub.
