Quba şəhərində yaşayan bir qrup sakin yağışlı havalarda ciddi problemlə qarşılaşır.
Shimal.New redaksiyasına yazan vətəndaşlar bildirirlər ki, Heydər Əliyev prospekti ilə Ə.Orucov küçəsinin kəsişməsində, “Kapital Bank” filialının yaxınlığında yerləşən fərdi yaşayış evlərinin həyətlərini hər yağışdan sonra kanalizasiya suları basır.
Onların sözlərinə görə, bu vəziyyət artıq bir ildir davam edir. Kanalizasiya sistemindəki nasazlıq səbəbindən təkcə həyətlər deyil, evlərin zirzəmiləri də su ilə dolur. Nəticədə ərazidə kəskin üfunət iyi yayılır və bu, həm sanitariya baxımından, həm də sağlamlıq üçün ciddi təhlükə yaradır.
“Yağış yağan kimi həyətimiz gölə çevrilir. Su təkcə bizim həyətə deyil, qonşuların evlərinə də dolur. Zirzəmilər su ilə dolduğuna görə istifadə etmək mümkün deyil. Üfunət iyinə görə yaşamaq çox çətindir. Müvafiq qurumlara dəfələrlə müraciət etmişik, amma nəticə yoxdur,” – deyə şikayətçilərdən biri bildirib.
Sakinlər aidiyyəti qurumlardan məsələyə ciddi yanaşmağı və problemin operativ şəkildə həllini tələb edirlər.
