Qubada şəhid və qazi övladları üçün təşkil olunan “Xarıbülbül” yay düşərgəsi başa çatıb.
Shimal.News xəbər verir ki, düşərgə tarixi Zəfərimizin 5-ci ildönümü münasibətilə Quba Olimpiya İdman Kompleksində keçirilib. Tədbirdə ümumilikdə 80 gənc iştirak edib.
Düşərgə çərçivəsində gənclər Vətən müharibəsi qaziləri ilə görüşüb, karyera planlaşdırılması və şəxsi inkişaf mövzularında təlimlərdə iştirak ediblər. Həmçinin yaradıcı master-klaslar, intellektual yarışlar, komanda quruculuğu oyunları, eləcə də gənclərin ideya və layihələrinin müzakirəsi təşkil olunub.
Bundan əlavə, proqramda müxtəlif özfəaliyyət çıxışları, musiqili-əyləncəli tədbirlər və idman oyunları da yer alıb.
Layihə Gənclər və İdman Nazirliyi və Gənclər Fondunun dəstəyi, “Zəfər” Şəhid Ailələrinə Dəstək İctimai Birliyi və “Böyük Qayıdış” Gənclər Təşkilatının birgə təşkilatçılığı ilə həyata keçirilib.
