Qubada uzun illərdir sahibkarlıq fəaliyyəti ilə məşğul olan Əyan Əli qızı Vəliyeva icra hakimiyyətindən şikayətçidir.
Shimal.News-un əldə etdiyi məlumata görə, sahibkar bildirir ki, Qəçrəş kəndində Ekologiya və Təbii Sərvətlər Nazirliyi ilə qanuni müqavilə əsasında meşə sahəsində fəaliyyət göstərir və burada heç bir əsaslı tikinti aparmadan müvafiq çərçivədə sahibkarlıqla məşğuldur. Lakin buna baxmayaraq, Quba Rayon İcra Hakimiyyəti tərəfindən müxtəlif formalarda təzyiqlərlə üzləşir.
Əyan Vəliyevanın sözlərinə görə, son aylarda icra başçısının müavini Şahin İsrafilov və memarlıq və tikinti şöbəsinin əməkdaşı Murad Qədirli tərəfindən obyektin sökülməsi ilə hədələnib. Halbuki, ərazidə quraşdırılan tikililər müvəqqətidir və əsaslı tikinti sayılmır. Qanunvericiliyə görə, belə hallara yalnız aidiyyəti dövlət qurumları müdaxilə edə bilər. İcra hakimiyyətinin bu cür qərarlar qəbul etməsi və ya tətbiq etməsi səlahiyyət xaricindədir.
Məsələ bununla bitmir. Sahibkar iddia edir ki, icra hakimiyyəti tərəfindən obyektin elektrik enerjisinin kəsilməsi üçün aidiyyəti qurumlara göstəriş verilib. Bu isə artıq sahibkarlıq fəaliyyətinə bilavasitə müdaxilə və işin dayanmasına səbəb olacaq addım kimi qiymətləndirilir.
Əyan Vəliyeva bildirir ki, ərazidə hər hansı qanun pozuntusu varsa, bu, müvafiq dövlət qurumları – o cümlədən Ekologiya və Təbii Sərvətlər Nazirliyi, Fövqəladə Hallar Nazirliyi və ya məhkəmə orqanları tərəfindən araşdırılmalı və hüquqi tədbir görülməlidir. Məhkəmə qərarı olmadan sahibkarın obyektinin sökülməsinə cəhd edilməsi isə hüquqi dövlət prinsipinə ziddir.
Qanunvericiliyə əsasən, icra hakimiyyəti yalnız inzibati və təşkilati məsələlərlə məşğul olur və bu kimi mülki-hüquqi münasibətlərə müdaxilə etməyə ixtiyarı yoxdur. Əks təqdirdə, bu, vətəndaşların mülkiyyət hüququnun pozulması və hüquqi dövlətin əsaslarının sarsıdılması kimi qiymətləndirilə bilər.
Hazırda sahibkar xanım bu məsələnin hüquqi müstəvidə araşdırılması və qanunsuz müdaxilələrin qarşısının alınması üçün aidiyyəti qurumlara müraciət etdiyini bildirir.
