Quba rayonunda qayınana ilə gəlin arasında yaranan mübahisə cinayət işi ilə nəticələnib.
Demokrat.az-ın məlumatına görə, hadisə ötən il avqustun 27-də kəndlərin birində qeydə alınıb.
1980-ci il təvəllüdlü Günel yaşadıqları evin qonaq otağında aralarında yaranan mübahisə zamanı 1967-ci il təvəllüdlü qayınanası Elmiranın sifət nahiyəsinə yumruqla vuraraq ona müxtəlif dərəcəli xəsarətlər yetirib.
Hadisə ilə bağlı Günel Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham olunub. O, ifadəsində bildirib ki, namaz qılmağa hazırlaşarkən qayınanası içərisində zibil olan vedrəni onun ibadət etdiyi yerə qoyub. Vedrənin götürülməsini istədikdə aralarında mübahisə yaranıb. Günelin sözlərinə görə, Elmira onu taxta parçası ilə vurub, o isə özünü qorumaq məqsədilə qayınanasının sifət nahiyəsinə əl ilə zərbə endirib.
Zərərçəkmiş isə bildirib ki, Günelin iradına görə mübahisə başlayıb və gəlini onu yerə yıxaraq göz nahiyəsinə zərbə endirib. O da özünü müdafiə etmək üçün taxta parçası ilə qarşı tərəfi vurduğunu deyib. Daha sonra özünü pis hiss etdiyi üçün evdən çıxaraq polisə müraciət edib.
Məhkəmə prosesində tərəflərin barışdığı məlum olub. Zərərçəkmiş gəlinini bağışladığı üçün Quba Rayon Məhkəməsinin hökmü ilə Günel barəsində cinayət təqibinə xitam verilib və o, cinayət məsuliyyətindən azad edilib.
