Qubada hər il Novruz bayramından 13 gün sonra qədim adətlərdən biri olan “Səməni atdı” mərasimi təşkil olunur.
Shimal.News -un məlumatına görə, bayramda cücərdilən səmənilər aprelin 2-də axar suya buraxılır. Mərasim ənənəyə uyğun olaraq, Qudyalçayın Quba şəhəri ərazisindən keçən hissəsindəki körpü üzərində keçirilir.
Körpünün üzərinə gələn sakinlər əvvəlcə ürəklərində niyyət edir, sonra isə səmənilərini çaya ataraq arzularının gerçəkləşməsi üçün dua edirlər. Yalnız Quba sakinləri deyil, ətraf rayonlardan gələnlər də “Səməni atdı” mərasiminə qoşulurlar.
İnanca görə, səmənini suya atan şəxsin arzusu növbəti Novruz bayramına qədər reallaşır. Əgər niyyət qəbul olunarsa, həmin şəxs gələn il mərasimə yenidən qatılmalı və oradakı insanlara şirniyyat paylamalıdır.
