Quba rayon İcra Hakimiyyəti başçısının Xucbala inzibati ərazi dairəsi üzrə nümayəndəsinin müavini Rauf Şıxməmmədovun buduqluları təhqir etməsi ilə bağlı iddialar var.
Belə ki, R. Şıxməmmədova məxsus olduğu düşünülən sosial şəbəkə hesabından Buduq kəndi barəsində paylaşılan videoya, “kənd tapmadınız danışmağa”, “ Qubanın üz qarası”, “bir dənə normal adam görmədim ordan” deyə şərhlər yazılıb.
Bu hadisədən sonra isə Quba rayon İcra Hakimiyyəti başçısı İlqar Mahmudov Rauf Adil oğlu Şıxməmmədovu tutduğu vəzifədən azad edib. Bununla bağlı İcra Hakimiyyəti paylaşım edib.
Məsələ ilə bağlı Shimal.News-a açıqlama verən R.Şıxməmmədovun sözlərinə görə, o, işdən özü ərizə yazaraq ayrılıb.
“Mənim, ümumiyyətlə “TikTok” profilim olmayıb. Aktiv olaraq “Facebook” və “Instagram” platformalarından istifadə edirəm. Bu yaxın zamanlarda FB profilim spam olunub. Ola bilər ki, bu arada mənim şəkillərimi götürərək, saxta profil açıblar. Yenə də, lazımi addımı ataraq ərizəmi yazıb tutduğum vəzifədən ayrıldım”, - deyə o bildirib.
Həyat yoldaşının da Budaq kəndindən olduğunu qeyd edən Şıxməmmədov sözlərinə belə davam edib:
“Bu addımı atan hər kimdirsə, ola bilər ki, mənimlə həyat yoldaşım arasında yaşanan problemdən dolayı belə bir şey etsin. Dünən Ağsaqqallar Şurasının sədri ilə də danışmışam, yanlış anlaşılmaya görə üzr də istəmişəm. O kəndlə bağlı müəyyən neqativ fikirlərim ola bilər, yarana bilər. Amma açıq şəkildə bunu haradasa bildirmək, mənə elə gəlir, düzgün bir addım deyil. Həyat yoldaşımla qeyd etdiyim kimi, aramızda problemlər var. O ailəsi ilə birlikdə evimdən uşaqlarımı oğurlayıb, çox şeylər baş verib…”
