Qubada səkidə əkilmiş güllərin sakinlərin gediş-gəlişinə mane olduğunu xəbər vermişdik.
Shimal.News-un məlumatına görə, xəbərdən sonra bu gün aidiyyəti qurumlar vəziyyətə müdaxilə edərək, gülləri və ağacları budamağa başlayıblar. Ancaq, hələ də dibçəklər səkilərin ortasında "stasionar" vəziyyətdə qalıb. Piyada səkilərini fəth edən güllər bəzək məqsədini yerinə yetirmək əvəzinə, istifadəçilərə "bəzəkli maneə" olmağa davam edir.
Sevindirici haldır ki, ölkəmizdə keçirilən möhtəşəm COP29 tədbirindən sonra bəzi məmurlarımız da yaşıllıqların, güllərin önəmini anlamağa başlayıblar. Lakin ekoloji təmizliyin əsas prinsiplərindən biri də şəhərlərin piyadayönümlü olması, insanların rahat şəkildə piyada gəzintiləri etməyə təşviq edilməsidir. Görünən odur ki, regionlarda yerləşən bəzi qurumların ciddi təlimlərə, maariflənməyə ehtiyacları var.
Çünki şəhər mədəniyyəti və təmizliyi yalnız güllərlə deyil, həm də insanların hərəkət azadlığını təmin etməklə möhkəmlənir.
