“Yurd” Gənclərin İntellektual İnkişafına Dəstək İctimai Birliyi tərəfindən “Şəhərdən kəndə-səyyar intellekt marafonu” layihəsinin icrasına başlanılıb.
Shimal.News xəbər verir ki, Quba rayonunun 8 müxtəlif kənd və qəsəbəsində yeniyetmə və gənclərin iştirakı ilə intellektual oyunlar keçiriləcək.
Layihənin ilk tədbiri Məckə-Xacə kənd tam orta məktəbində təşkil edilib. Yarışda Təngəaltı, Çiçi, Səbətlər, Afurca, Püstəqasım, Rustov, Məckə-Xacə və Qam-qam kəndlərinin təmsilçiləri iştirak edib.
Oyun Azərbaycan coğrafiyasının, flora və faunasının, tarixinin, ədəbiyyatının, mədəniyyət və incəsənətinin, tarixi şəxsiyyətlərinin, mədəniyyət və incəsənət xadimlərinin təbliğ edilməsi məqsədilə təşkil olunub.
Seçim turunun yekununda Rustovun “Zəfər” komandası 1-ci, Çiçi kəndini təmsil edən “Qartallar” komandası 2-ci, Məckə-Xacənin təmsilçisi “Odlar Yurdu” 3-cü yeri tutublar. Yarışın əsasnaməsinə uyğun olaraq ilk iki yeri tutan komandalar final mərhələsində iştirak etmək haqqı qazanıb.
Növbəti turnir Dağlı kənd tam orta məktəbində keçiriləcək.
