Qubanın Qırmızı Qəsəbəsində Əməkdar jurnalist Raşbil Zaxaryayevin 85 illiyinə həsr olunan sərgi keçirilib. Bu haqda ShimalNews 22 iyul tarixində məlumat verir.
Tədbir Dağ Yəhudilərinin İrsi Mərkəzində təşkil olunub. Burada Milli Məclisin deputatları, yerli icra hakimiyyəti orqanlarının nümayəndələri, İsrailin Azərbaycandakı səfiri Corc Dik, mərhum jurnalistin oğlu, Dağ Yəhudilərinin Beynəlxalq Xeyriyyə Fondunun (STMEGI) prezidenti German Zaxaryayev iştirak ediblər.
German Zaxaryayev atası Raşbil Zaxaryayevin yubileyinə həsr olunmuş sərginin əhəmiyyətindən bəhs edərək, onunla bağlı xatirələrdən danışıb. Bakı Dövlət Universitetinin jurnalistika fakültəsinin məzunu olan gənc qələm sahibinin 1966-cı ilin noyabr ayından Qubada nəşr olunan “Şəfəq” qəzeti redaksiyasında fəaliyyətə başladığını xatırladıb.
Yubilyar, eləcə də lirik şeirləri ilə tanınıb. Tədbirə qatılan Qırmızı qəsəbənin İ.Xanukov adına 1 nömrəli tam orta məktəbinin şagirdləri Raşbil Zaxaryayevin qələmə aldığı şeir parçalarından nümunələr səsləndiriblər.
