Qubada yoluxucu xəstəliklərlə mübarizə üçün tədbir keçirilib. Bu haqda ShimalNews 2 dekabr tarixində ADPU-nun Quba filialına istinadən məlumat verir.
Tədbir ADPU-nun Quba filialının və Quba Tibb Kollecinin birgə təşkilatçılığı ilə QİÇS ilə Mübarizə Gününə həsr edilib.
QİÇS - Qazanılmış İmmun Çatışmazlığı Sindromu, bu HİV (İİV)-infeksiya fonunda inkişaf edən, immun sistemini zədələyən və orqanizmin müdafiə qüvvələrini zəiflədən xəstəlikdir.
Görüşdə çıxış edən tibb işçiləri maarifləndirmə aparıblar. Onlar bildiriblər ki, QİÇS-yə yoluxmadan sonra 2-6 həftə ərzində qızdırma, gecə tərləmələri, şişmiş limfa düyünləri, ürəkbulanma kimi qripəbənzər simptomlar üzə çıxa bilər. Kəskin HİV infeksiyasında simptomların rastgəlmə tezliyi nəzərə alınır.
“İİV infeksiyası/QİÇS pandemiyası dünya səhiyyəsinin infeksion xəstəliklər sahəsində ən ciddi problemlərindən biridir. Dünyada təxminən 40 milyona yaxın insan İİV daşıyıcısıdır".
Sonda gəncləri maraqlandıran suallar həkimlər tərəfindən cavablandırılıb.
