Quba rayonunun Alekseyevka kəndi ərazisində, Quba–Xaçmaz yolu ilə kəndin mərkəzi yolunun kəsişməsində yaxın günlərdə işıqforların quraşdırılması planlaşdırılır.
Shimal.News xəbər verir ki, artıq ərazidə hazırlıq işlərinə start verilib, dirək üçün yer qazılıb, betonlama işləri aparılıb və infrastrukturun qurulmasına başlanılıb.
Sakinlərin sözlərinə görə, sözügedən kəsişmə son illərdə xüsusilə təhlükəli nöqtələrdən birinə çevrilmişdi. Əsasən sola dönən avtomobillər və piyadalar üçün hərəkət növbəliliyində ciddi çətinliklər yaranırdı. Səhər və axşam pik saatlarda sürücülər dəqiqələrlə gözləməli olur, bu isə həm sıxlığa, həm də qəza riskinin artmasına səbəb olurdu.
Qeyd olunur ki, ödənişli yolun istifadəyə verilməsindən sonra Quba–Xaçmaz istiqamətində nəqliyyat axını daha da intensivləşib. Bu baxımdan sözügedən ərazidə nizamlayıcı vasitəyə ehtiyac yaranmışdı.
Sürücülər hesab edirlər ki, işıqforların quraşdırılması ilə hərəkət daha təhlükəsiz və nizamlı olacaq, eyni zamanda yol-nəqliyyat hadisələrinin sayı azalacaq. Bildirilir ki, bu, Quba–Xaçmaz yolunda quraşdırılan ilk işıqforlar olacaq.
