Quba rayonunda bacısının həyat yoldaşına xəsarət yetirən 24 yaşlı şəxs cinayət məsuliyyətindən azad edilib.
Demokrat.az-ın məlumatına görə, hadisə ötən ilin iyunun 14-də kəndlərin birində baş verib. 2002-ci il təvəllüdlü İlkin yeznəsi Mübarizlə mübahisə edib. Mübahisə zamanı tərəflər arasında əlbəyaxa dava düşüb və İlkin Mübarizə müxtəlif dərəcəli bədən xəsarətləri yetirib.
İlkin Cinayət Məcəlləsinin 128-ci maddəsi ilə ittiham olunub. O, ifadəsində bildirib ki, yeznəsi Mübariz spirtli içki qəbul etdiyinə görə ailədə problemlər yaranıb. Hadisədən bir gün əvvəl bacısı Samirə ərinin ailəsinə baxmadığını və pulu lüzumsuz xərclədiyini deyib. Ertəsi gün Mübariz sərxoş halda qohumunun həyətinə gəlib və aralarında mübahisə yaranıb. Mübahisə zamanı İlkin onu vuraraq yerə yıxıb.
Məhkəmədə həm təqsirləndirilən, həm də zərərçəkmiş tərəfin barışdığı məlum olub. Zərərçəkmiş şikayətini geri götürüb.
İlkin cinayət məsuliyyətindən azad edilib.
