Quba Rayon Məhkəməsi 34 yaşlı Elvin İmamovun arvadı Səidəyə (ad-soyad şərtidir – red.) xəsarət yetirməsi işinə baxıb.
Shimal.News xəbər verir ki, hadisə bu ilin 27 fevral tarixində baş verib. Şəxsi münasibətlər zəminində yaranmış mübahisə zamanı E.İmamov yoldaşının üz nahiyyəsindən qəsdən yumruqla, daha sonra bədəninə təpiklə vurub. Onun barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Cinayət işi üzrə ifadə verən E.İmamov özünü təqsirli bilib. Məhkəmədə məlum olub ki, təqsirləndirilən şəxs zərərçəkmişlə barışıb, S.İmamova ərinə qarşı olan şikayətini geri götürüb. Bu səbəbdən məhkəmə cinayət təqibinə xitam verib.
