Qubada “GubaEco” layihəsinə başlanıldı.
Shimal.News xəbər verir ki, Kənd Təsərrüfatı Nazirliyinin Meyvəçilik və Çayçılıq Elmi Tədqiqat İnstitutu və Quba Rayonu İcra Hakimiyyətinin birgə təşəbbüsü ilə Quba rayonu Zərdabi qəsəbəsində “GubaEco” layihəsinə start verilib.
Layihə əsasında Zərdabi ETB-da 2 ha ərazidə institutun Mikroklonal çoxaltma laboratoriyasında in vitro üsulu ilə çoxaldılan pavlovniya ağaclarından ibarət bağ salınır.
Pavlovniya ağacları Asiya, Avropa, Şimali Amerika və Avstraliyada kommersiya, tibbi və dekorativ məqsədlər üçün əkilir, ətraf mühitin fərqli mühitlərinə uyğunlaşa bilir, yüksək böyümə tempi və müstəsna regenerativ xüsusiyyətləri ilə fərqlənir. Onlar diametri 45-75 sm olan böyük yarpaqları ilə fərqlənir. Pavlovniya digər ağaclara nisbətən 10 dəfə çox CO2 udmaq bacarığına malikdir. Belə ki, 1 ağacın çətiri 1 ildə ortalama olaraq 22 kq karbon qazı udaraq 6 kq oksigen qazı buraxır.
Bu ağacın kökləri torpağı eroziyadan qoruyur, çirklənmiş (civə, arsen və s.) əraziləri təmizləyir, gözəl dekorativ bitki olmaqla şəhərlərdə radiasiya rejiminə təsir edir, səs-küyü azaldır, kölgəlik yaradır, patogen bakteriyalardan təmizləyir və tozu azaldır.
