Quba şəhərinin mərkəzində, Əliqulu Nərimanov küçəsində yerləşən park çayxana tərəfindən zəbt olunub.
Söhbət Quba-Xaçmaz Regional Təhsil İdarəsinin, 2 saylı Azad Məmmədov adına Təbiət Təmayüllü Liseyin, Mehrab Niftəliyev adına Texniki Təmayüllü Liseyin və “ABAD Factory” müəssisəsinin qarşısında yerləşən park ərazisindən gedir.
Shimal.News-a müraciət edən sakinlərin sözlərinə görə, həmin parkda fəaliyyət göstərən çayxana məktəblilərin və müəllimlərin gediş-gəlişinə ciddi maneə yaradır.
“Çayxanada səs-küy, qəhqəhə və siqaret qoxusu məktəblilərin, valideynlərin və müəllimələrin rahatlığını pozur. Aidiyyəti qurumlar isə vəziyyəti görməzdən gəlirlər, hətta bəzən özləri də orada çay içirlər”, – deyə sakinlər bildiriblər.
Sakinlər parkın ictimai istifadəyə qaytarılmasını və çayxananın oradan uzaqlaşdırılmasını tələb edirlər.
