Quba şəhərinin Səkinə xanım və Əliqulu Nərimanov küçələrinin kəsişməsində sakinləri narahat edən təhlükəli vəziyyət yaranıb.
Məsələ ilə bağlı Shimal.News-a müraciət edən vətəndaşların bildirdiyinə görə, ərazidə yerləşən küçə işıqlandırma dirəyinin qapağı qırılaraq asılı vəziyyətdə qalıb.
Sakinlər qeyd ediblər ki, sözügedən ərazi Quba şəhəri Zaur Cəfərov adına 3 saylı tam orta məktəbin qarşısında yerləşir. Hər gün bu ərazidən yüzlərlə məktəbli, valideyn və ümumilikdə minlərlə sakin istifadə edir. Dirəyin üst hissəsində asılı qalan qırıq qapaq külək və ya kiçik silkələnmə nəticəsində istənilən an insanların üzərinə düşə bilər. Eyni zamanda, işıq dirəyinin qoruyucu şüşə hissəsi tam sıradan çıxaraq təhlükəli vəziyyətdə sallanır.
Onların sözlərinə görə, problem uzun müddətdir mövcuddur, lakin indiyədək aradan qaldırılmayıb.
Digər narahatlıq doğuran məqam isə ərazinin gecə saatlarında kifayət qədər işıqlandırılmamasıdır. Sakinlər aidiyyəti qurumlardan məsələni təcili nəzarətə götürməyi, işıq dirəyinin bərpa olunmasını və təhlükənin aradan qaldırılmasını xahiş edirlər.
