"Bir Könüllü" Tələbə Təşkilatının və "Pathtomath" Tələbə Riyaziyyatçılar Klubunun birgə təşəbbüsü ilə 2025-ci il 24-29 mart tarixlərində Quba rayonunda tələbələrin riyaziyyat üzrə yaz düşərgəsi - “MathCamp 2025” təşkil ediləcək.
Shimal.News xəbər verir ki, bu barədə Elm və Təhsil Nazirliyi məlumat yayıb.
Bildirilib ki, düşərgənin əsas məqsədi tələbələr arasında ali riyaziyyata marağı artırmaq, onları riyaziyyatın yeni texnologiyalar və süni intellekt sahələrində tətbiqi barədə məlumatlandırmaq, yaz tətili dövründə tələbələrin riyazi biliklərini gücləndirməkdir.
Düşərgədə riyaziyyat, fizika və texniki ixtisaslarda bakalavriat səviyyəsi üzrə III və IV kursda, eləcə də magistratura, doktorantura səviyyəsində təhsil alan tələbələr, məzunlar və gənc mütəxəssislər iştirak üçün müraciət edə bilərlər.
Düşərgə çərçivəsində iştirakçılar üçün ali riyaziyyatın əsasları, riyaziyyatın yeni texnologiyalar və süni intellekt sahəsində tətbiqləri, ədədlər nəzəriyyəsi və kriptoqrafiya mövzularında mütəxəssislər tərəfindən xüsusi hazırlanmış təlimlər keçiriləcək.
İştirakçıların həm öyrənməsi, həm də əylənməsi məqsədilə düşərgədə müxtəlif idman və bilik yarışları təşkil ediləcək. Təlimlərin sonunda bütün iştirakçılar sertifikatla təltif olunacaqlar.
Seçilmiş namizədlər "Riyazi analiz" və "Cəbr və ədədlər nəzəriyyəsi" fənləri üzrə baza biliklərinin yoxlanılması məqsədilə təşkil olunacaq test imtahanında iştirak edəcəklər. Test imtahanı mart ayında təşkil olunacaq.
Düşərgədə iştirak etmək istəyən tələbələr 2025-ci il 8 mart tarixinədək link vasitəsilə qeydiyyatdan keçə bilərlər: //forms.gle/gk99Hn12FjCWsj3U9
