Təsəvvür edin, bir nəfər gözəl bir restorana gedir. Masaya əyləşir, menyunu açır… amma boşdur. Sifariş verir, ofisiant gülümsəyərək "Mətbəximiz var, amma yemək yoxdur" deyir. Absurd səslənir, elə deyilmi?
Shimal.News xəbər verir ki, Qubada mədəniyyət müəssisələrinin halı da eynən belədir.
Son 10 gündür ki, bu müəssisələr internetsiz qalıblar. Dövrümüzdə internet işıq, su, qaz kimi əsas ehtiyacdır. Onsuz sənədləşmə dayanır, tədbirlər koordinasiya olunmur, kitabxanalar onlayn kataloqlarına girə bilmir, muzeylər elektron bazalarına çıxış edə bilmir. Yəni mədəniyyət müəssisələri sanki karantinə alınıb.
Amma Xaçmaz Regional Mədəniyyət İdarəsi nə edir? Görünən odur ki, ya qış yuxusuna gedib, ya da özünü kor-kor, görməz-görməzliyə vurur. Halbuki sənəd tələb etməkdə çox mahirdir. İşçilərə tapşırır ki, "Bunu gətir, onu doldur, hesabat göndər". Necə göndərsinlər? Göyərçinlə? Yoxsa naxışlı dulusçu qabında?
Əgər internet məsələsi həll olunmayacaqsa, bəlkə də mədəniyyət işçilərinə dəftər-qələm, şam işığında işləmək üçün lampa, bəlkə də teleqraf göndərmək üçün morze cihazı paylansın? Axı, biz texnologiyanın zirvəsində yox, bir əsr geri getmişik.
Mədəniyyət ocaqlarını internetdən məhrum etməklə, onları da tarixi abidəyə çevirmək istəyirlər?
Məhəmməd Tağı
