Quba rayonunda 56 yaşlı kişi kafedə dava salıb obyekt sahibinə xəsarət yetirib.
Demokrat.az-ın məlumatına görə, hadisə bu il fevralın 28-də, Quba şəhəri, “Bazar” adlanan ərazidə yerləşən kafedə baş verib.
Rayon sakini, 1969-cu il təvəllüdlü Çərkəs aralarında yaranmış mübahisə zamanı Zaurun sifət, baş, bədən nahiyəsinə yumruq və təpiklə qəsdən zərbə endirib.
Hadisəni törədən Çərkəsin barəsində Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan edilib.
Təqsirləndirilən şəxs bildirib ki, tanışı Şamillə saat 17 radələrində bazar ərazisində görüşüb, Zaur adlı şəxsin kafesinə gedib: “Həmin kafedə yemək yeyib spirtli içki qəbul etdik. Zaur məndən hesabı istədiyi üçün əsəbiləşdim. Ayağa qalxaraq bir dəfə Zaurun sifət nahiyyəsindən və təpiklə ayağından vurdum.. Bundan sonra oradan getdim. Sonradan zərərçəkmiş şəxs ilə barışmaq istəsəm də, o, barışmadı”.
Rayon Məhkəməsində baxılan işdə məhkəmənin hökmü ilə Çərkəs 6 ay müddətinə azadlıqdan məhrum edilib.
Təqsirləndirilən şəxsin cəza çəkdiyi müddətdə Quba rayonunun hüdudlarını tərk etməsi qadağan olunub. Onun üzərinə təyin olunmuş cəza müddətində axşam saat 23:30-dan səhər saat 06:00-dək yaşayış yerini tərk etməmək, elektron nəzarət vasitəsini gəzdirmək və həmin vasitənin işlək vəziyyətdə saxlanılması üçün ona xidmət etmək, müvafiq məhkəmə qərarı olmadan yaşayış yerini dəyişdirməmək vəzifəsi qoyulub.
