Quba rayonunun ucqar kəndlərindən olan Çarxaçu kəndinin sakinləri deyir ki, torpaqsız kəndli yaşaya bilməz. Onların məhsuldar torpaqlarını qanunsuz şəkildə əlindən alıb, əvəzinə heç nəyə yaramayan daşlı-qayalı ərazini pay torpağı kimi təqdim ediblər.

Analoq.az-a müraciət edən sakinlər deyir ki, vaxtilə kəndin balansında olan əkinə yararlı torpaqlar bələdiyyə sədri və digər məmurlar tərəfindən qəsdən kəndin balansından çıxarılıb və qanunsuz olaraq qonşu Xaltan kəndinin balansına salınıb.

Bunu Xaltan kənd icra nümayəndəsi, aqrar islahat komissiyasının sədri Rafiq Tayibov 1995-1997-ci illərdə təşkil edib. Şikayətçilər bildirirlər ki, bu şəxs həmin kəndin sakini olduğu üçün ərazini sonradan mənimsəmək üçün qanunsuz olaraq o kəndin balansına keçirib.

Çarxaçu sakinlərinə çay yatağı olan, yolu olmayan, əkinə yaramayan daş-qayalıqdan və gil torpaqdan olan ərazilər verilib. Həmin yer 7-8 km məsafədə yerləşməsinə baxmayaraq, ora yalnız çayda su olmayanda UAZ maşını ilə 1 saatdan artıq vaxta çatmaq olar. Sakinlər əraziyə müvafiq idarələrdən mütəxəssis də dəvət ediblər və onlar da rəsmi sənədlə rəy verib ki, bu ərazi istifadəyə tamamilə yararsızdır.

Sakinlər deyir ki, bu torpaq bələdiyyə xəritəsində qonşu kəndə verilmiş görünür, amma orada nə möhür var, nə də kiminsə imzası. Bilinmir ki, kim necə, hansı əsasla torpağı bu kənddən alıb sakinlərin qanuni almalı olduqları pay torpağına kim sahib çıxıb.

Sovet dövründə Çarxaçuda 500 nəfər, hazırda isə 200 nəfərə yaxın əhali qalıb. Onlar səbəb kimi əkib-becərmək üçün torpağın olmaması və dolanışığın çox çətin olduğunu bildirirlər. Kənddə boş qalmış evlər çoxdur. Cəmi 25-30 evdə yaşayış var.

Bu ucqar kənddə nə qaz var, nə tibb məntəqəsi, nə internet, nə də yol var. Bura yalnız UAZ və Niva markalı maşınlar gedə bilir. Onlar da 1-2 gedişə xarab olur. Buna görə də rayon mərkəzindən bu kəndə maşın 70 manata aparır. Hər hansı bir xəstəni təcili olaraq rayon mərkəzinə çatdırmaq saatlarla vaxt aparır və böyük xərc tələb edir. Qış dövründə isə bu yolla gedib gəlmək mümkün deyil.

Yerli əhali yalnız həyətlərində bir neçə meyvə ağacı, toyuq-cücə, heyvan saxlamaqla birtəhər vəziyyətdən çıxırlar. Onlar ölkə başçısından və müvafiq dövlət orqanlarından öz qanuni haqlarının təmin edilməsini, onların pay torpaqlarının verilməsini xahiş edirlər.

Qeyd edək ki, kəndin yaxınlığında 30 ha yararlı torpaq sahəsi var, lakin onu da sakinlərə vermirlər ki, bura Xaltan kəndinin örüş yeridir. Bu yer qanunsuz əməliyyatdan əvvəl bu kəndin balansında olub.

Məsələ ilə bağlı Xaltan kənd bələdiyyəsinin sədri Budaq Şixnəsirli ilə əlaqə saxlayıb münasibət öyrənmək mümkün olmayıb.