Quba rayonunun Gümürdəhnə kəndinə yırtıcı heyvanlar, xüsusilə də ayılar hücum edirlər.
BAKU.WS-in məlumatına görə, son iki ay ərzində ayılar mal-qara və digər təsərrüfat heyvanlarına ciddi ziyan vurublar:
"Hazırda kənddə 46 ev var və demək olar ki, hər ailənin təxminən 10 baş heyvanı var. Lakin hər gün 1-3 heyvan yırtıcılar tərəfindən tələf edilir".
Sakinlər bir neçə dəfə müvafiq qurumlara müraciət etsə də, tədbirlər qeyri-kafi olaraq qiymətləndirilir. Belə ki, yırtıcı heyvanlarla mübarizə aparmaq üçün kəndə yalnız iki şəxs göndərilib. Lakin onlara yalnız yırtıcı heyvanlara toxunmamaq, onları qorxutmaq təlimatları verilib:
"Deyirlər ki, yırtıcı heyvanlara ziyan vurulsa, cərimə tətbiq ediləcək. Bəs mənim təsərrüfatıma dəyən ziyan, onu kim ödəyəcək?".
