Quba şəhərində naməlum şəxslər tərəfindən kanalizasiya lüklarının qapaqları oğurlanıb.
Bu barədə Shimal.News-a Qubada fəaliyyət göstərən bloqer Elnur Zeynalov məlumat verib.
Onun sözlərinə görə, oğurluq halları əsasən Fətəlixan küçəsində və digər mərkəzi ərazilərdə baş verib. Bir gecə ərzində 10-a yaxın kanalizasiya lüku açıq qalıb ki, bu da həm avtomobillər, həm də piyadalar üçün ciddi təhlükə yaradıb.
Oğurluq hadisəsindən sonra bir neçə avtomobil açıq lüka düşərək zədələnib. Bəzi piyadalar da açıq qalmış lüklara düşərək xəsarət alıblar. Xüsusilə gecə saatlarında küçədə işıqlandırmanın zəif olması təhlükənin miqyasını daha da artırıb.
Elnur Zeynalovun sözlərinə görə, kanalizasiya qapaqları ehtimal ki, metal qəbulu məntəqələrinə satılıb. Bu, son zamanlar ölkənin müxtəlif bölgələrində təkrarlanan bir problemə çevrilib. Metal qapaqlar müəyyən çəkiyə malik olduğuna görə, onları qəbul məntəqələrində pul qarşılığında təhvil vermək mümkündür.
Quba sakinləri vəziyyətdən narahat olduqlarını bildiriblər. Onların fikrincə, aidiyyəti qurumlar oğurluq hallarının qarşısını almaq üçün tədbirlər görməlidir. Eyni zamanda, lükların açıq qalması səbəbindən yol-nəqliyyat hadisələrinin artması ehtimalı var.
