Gənclərin İnkişaf və Karyera Mərkəzinin Quba-Xaçmaz regional nümayəndəliyi, Dövlət Məşğulluq Agentliyinin Quba-Xaçmaz Regional Məşğulluq filialı və Azərbaycan Dövlət Pedaqoji Universitetinin Quba filialının birgə təşkilatçılığı “LevelUP” karyera forumu keçirilib.
Shimal.News xəbər verir ki, “Şəxsi inkişaf və karyera planlaması” mövzusunda baş tutan müzakirənin spikerləri qismində Toğrul Ələkbərov, Elvin Dadaşsoy, Şəhriyar Laçınov və Pərviz Əfəndizadə iştirak edib.
Panel müzakirədə “Qubadan dünyaya marafon”, “Öz biznesinə başla”, “İntizam – özünə etdiyin ən böyük yaxşılıq”, “Karyerada davamlılıq” mövzuları ətrafında fikirlər səsləndirilib.
Çıxışların sonunda gənclərin sualları spikerlər tərəfindən cavablandırılıb.
Layihənin bu gün keçiriləcək II mərhələsində gənclər üçün regionda fəaliyyət göstərən dövlət qurumları, təşkilat və şirkətlərin mövcud vakansiya, təcrübə və könüllü proqramlarından ibarət sərgi təşkil olunacaq. Sərgi saat 11:00-da Azərbaycan Dövlət Pedaqoji Universitetinin Quba filialında keçiriləcək. İştirak üçün şəxsiyyət vəsiqəsinin olması mütləqdir.
