Azərbaycan Respublikasının Gənclər və İdman Nazirliyi tərəfindən gənclər təşkilatlarının fəaliyyətlərinin dəstəklənməsi məqsədilə 2024-cü il üzrə elan edilmiş qrant müsabiqəsi çərçivəsində “Yurd” Gənclərin İntellektual İnkişafına Dəstək İctimai Birliyi tərəfindən icra olunan “Şəhərdən kəndə-səyyar intellekt marafonu” layihəsinin final mərhələsi keçirilib.
Shimal.News xəbər verir ki, Quba rayonunun 8 müxtəlif kənd və qəsəbə zonasında yeniyetmə və gənclərin iştirakı ilə intellektual oyunların keçirilməsini nəzərdə tutan layihənin final mərhələsinin tədbiri Quba rayonu Birinci Nügədi kənd 1 nömrəli tam orta məktəbində təşkil edilib.
Final mərhələsində Rustov kəndinin “Zəfər”, Çiçi kəndinin “Qartallar”, Dağlı kəndinin “Ekipaj”, Küpçal kəndinin “Zəfər” , Susay kəndinin “Susay”, Digah kəndinin “Uğur”, Qımılqışlaq kəndinin “Qımılqışlaq”, Əliməmmədoba kəndinin “Ultimatum”, İkinci Nügədi kəndinin “Azman”, Birinci Nügədi kəndinin “İntellekt”, İsnovqışlaq kəndinin “Zirvə”, Mirzəqışlaq kəndinin “Zəka”, Zərdabi qəsəbəsinin “İstiqlal”, Barlı qəsəbəsinin “Viktoriya”, Alekseyevka kəndinin “RT-Team” və Quba şəhərinin “İntellekt” komandaları tərkibində 80 nəfər yeniyetmə və gənc iştirak edib.
Rəsmi hissədən sonra keçirilən “Nə? Harada? Nə zaman?” intellektual oyunu üzrə final mərhələsində Quba rayonunun Zərdabi kəndini təmsil edən “İstiqlal” komandası qalib olub. Küpçal kəndinin “Zəfər” komandası ikinci, Susay kəndinin eyniadlı komandası isə üçüncü yeri tutub. Yekunda qalib və mükafatçılar kitab hədiyyələri, diplom, medal və kubokla təltif olunublar.
Qeyd edək ki, layihəyə Qubanın 8 müxtəlif kənd və qəsəbə zonasında keçirilən intellektual yarışlarda ümumilikdə rayonun 72 kənd və qəsəbəsində yaşayan və təhsil alan 442 nəfər yeniyetmə və gənc qatılıb.
