Qubanın Dağlı kənd tam orta məktəbində “Şəhərdən kəndə-səyyar intellekt marafonu” layihəsi keçirilib.
Shimal.News xəbər verir ki, yarışda Quba rayonunun Dağlı, Qımıl, Qəçrəş, Küsnətqazma, Üçgün, Küpçal, Qələdüz və Ağbil kəndlərində yaşayan və təhsil alan yeniyetmə və gənclər iştirak ediblər.
Yarışın keçirilməsində əsas məqsəd Azərbaycan coğrafiyasının, flora və faunasının, tarixinin, ədəbiyyatının, mədəniyyət və incəsənətinin, tarixi şəxsiyyətlərinin təbliğ edilməsi, eyni zamanda gənclərin intellektual oyunlar vasitəsilə bilik və bacarıqlarının artırılması və asudə vaxtının səmərəli təşkilidir.
Yarışın yekununda Dağlı kəndini təmsil edən “Ekipaj” komandası birinci, Küpçal kəndini təmsil edən “Zəfər” komandası ikinci, Küsnətqazma kəndinin təmsilçisi olan “Zirvə” komandası isə üçüncü yeri tutub. İlk iki yeri tutan komandalar final mərhələsində iştirak etmək haqqı qazanıb. Yekunda qalib və mükafatçılar diplom, medal və kubokla təltif olunublar.
Qeyd edək ki, layihə çərçivəsində növbəti turnir Quba rayonu Digah kənd tam orta məktəbində keçiriləcək.
