Qubada ağır vəziyyətdə xəstəxanaya çatdırılan hamilə qadın və körpəsi xilas edilib.
28 sentyabr 2025-ci il səhər saat 09:00 radələrində 36 yaşlı hamilə qadın ağır vəziyyətdə Quba Rayon Mərkəzi Xəstəxanasına hospitalizasiya olunub. Pasiyentə 32 həftəlik hamiləlik, uşaqlıq üzərində çapıq, mərkəzi cift gəlişi və ciftin vaxtından əvvəl ayrılması diaqnozu qoyulub. İlkin tibbi yardımdan sonra qadın güclü qanaxma ilə Quba Regional Perinatal Mərkəzinə təxliyə olunub.
Shimal.News xəbər verir ki, bu baradə Tibbi Ərazi Bölmələrini İdarəetmə Birliyi (TƏBİB) məlumat yayıb.
Məlumata əsasən, mərkəzdə zəruri tibbi müdaxilələr aparıldıqdan sonra həkimlərin qərarı ilə qeysəriyyə kəsiyi əməliyyatı həyata keçirilib. Nəticədə 1600 qram çəkidə və 42 sm boyunda oğlan uşağı dünyaya gəlib. Ağır qanaxma səbəbilə körpə asfiksiya vəziyyətində doğulub, lakin əməliyyat blokunda aparılan reanimasiya tədbirləri ilə həyata qaytarılıb.
Körpənin ağciyər funksiyasını dəstəkləmək üçün dövlət təminatlı “Curosurf” preparatı LISA metodu ilə tətbiq olunub və o, 3 həftə müddətində süni tənəffüs dəstəyi ilə təmin edilib.
Ana Reanimasiya şöbəsində, körpə isə Yenidoğulmuşların reanimasiyası şöbəsində müalicəsini davam etdirib. Həkimlərin intensiv səyləri nəticəsində körpənin nəfəsi bərpa olunub, əmmə refleksi aktivləşib, qida qəbulunda və laborator göstəricilərində normaya uyğunlaşma müşahidə edilib.
Vəziyyətləri stabilləşən ana və körpə xəstəxanadan evə buraxılıblar.
