Qubada qayınana gəlinini döyüb.
Shimal.News-un əldə etdiyi məlumata görə, hadisənin istintaqı Quba Rayon Məhkəməsində keçirilib.
Belə ki, təqsirləndirilən Gülçin Əliyeva (ad şərtidir) 1962-ci ildə Quba rayonunda anadan olub. O, nəvələrini görmək üçün oxuduqları məktəbə gəlib. Bu zaman gəlin qayınanasının orada olduğunu görüb, üstünə hücum çəkib. Aralarında yaranmış mübahisə zamanı Gülçin Əliyeva gəlini Elminaz Qurbanovanı (ad şərtidir) döyüb.
Gülçin Əliyeva Azərbaycan Respublikası CM-nin 128-ci (qəsdən sağlamlığa ağır zərbə vurma) maddəsi ilə təqsirləndirilib.
Təqsirləndirilən Gülçin Əliyeva ona elan olunmuş ittiham üzrə özünü təqsirli bilərək ifadəsində göstərib:
“Gəlinim Elminaz təxminən 3 ay bundan əvvəl nəvələrimi də götürüb evdən getdi. Mən də uşaqlardan ötrü çox darıxmışdım. Onları görmək üçün noyabrın 27-si Quba rayonu Vladimirovka kəndi ərazisində yerləşən məktəbin qarşısına getdim. Məktəbin xadiməsi dərs vaxtı uşaqlar ilə görüşün mümkün olmadığını bildirdi. Kənarda dayanıb dərs vaxtının qurtarmağını gözləyirdim ki, Elminaz məktəbin qarşısına gəldi. Bu zaman aramızda mübahisə yarandı və o, üstümə hücum çəkdi. Mən də ona qarşılıq verdim. Məhkəmədən yaşlı olmağımı nəzərə alıb yüngül cəza verilməsini istəyirəm”.
Məhkəmə iclasında zərərçəkmiş Elminaz Qurbanova ifadə verib:
“Noyabrın 27-si məktəbdən mənə zəng gəldi. Müəllim qayınanamın və baldızımın övladımı görməkdən ötrü məktəbə gəldiyini bildirdi. Məktəbin qarşısına yaxınlaşan zaman qayınanamla aramızda sözlü mübahisə yarandı. Bu zaman o, bədənimin müxtəlif nahiyələrinə yumruq zərbələri endirməyə başladı”.
Tərəflərin ifadəsindən sonra məhkəmənin qərarı ilə Gülçin Əliyevanın qazancından 10 faiz dövlət nəfinə pul tutulmaqla 8 ay müddətinə islah işləri növündə cəza təyin edilib.
Fidan İlqar
