Quba Olimpiya İdman Kompleksində “Enactus Azərbaycan”ın təşkilatçılığı, Gənclər və İdman Nazirliyi, Gənclər Fondu və Azərbaycan Tələbə Gənclər Təşkilatları İttifaqının dəstəyi ilə “Enactus Çempionlar Liqası Simulyasiya” düşərgəsi təşkil olunub.
Shimal.News xəbər verir ki, üç gün davam edən düşərgədə ölkənin müxtəlif universitetlərini təmsil edən 120 tələbə iştirak edib. Layihənin əsas məqsədi “Enactus” komandalarının bilik və bacarıqlarını inkişaf etdirmək, gənclərin liderlik, sahibkarlıq və innovativ düşüncə sahəsində potensialını gücləndirmək, həmçinin onları milli yarışa və Taylandda keçiriləcək “Enactus” Dünya Kubokuna hazırlamaq olub.
Düşərgə çərçivəsində iştirakçılar peşəkar təlimçilərin rəhbərliyi ilə intensiv sessiyalara qatılıblar. Təlimlər “Sahibkarlıq və innovasiya”, “Təqdimat və kommunikasiya”, “Layihə idarəetməsi və strategiyası”, “Dayanıqlılıq və təsir” kimi mövzuları əhatə edib.
Təlimlərlə yanaşı, düşərgə müddətində Enactus milli yarış formatında simulyasiya edilən yarımfinal və final mərhələləri də təşkil olunub. Yarışın nəticələrinə əsasən, Azərbaycan Tibb Universiteti birinci, Bakı Dövlət Universiteti ikinci, Lənkəran Dövlət Universiteti isə üçüncü yerə layiq görülüb.
