Quba rayon Zərdabi qəsəbə sakini Şahin Məmmədov hər gün təhlükə ilə üz-üzədir. Lakin bu təhlükə nə təbiət hadisəsi, nə də qəfil baş verən bir fəlakətdir. Bu, insan səhlənkarlığının, məsuliyyətsizliyin və laqeydliyin acı nəticəsidir.
Shimal.News redaksiyasına müraciət edən Şahin Məmmədov bildirib ki, evinin qarşısında iki metrdən artıq dərinliyi olan suvarma quyusu açıq vəziyyətdədir:
“Gecələr bu quyuya atların düşməsi adi hala çevrilib. Bəs sabah ora bir insan, bir uşaq düşsə, nə olacaq? Sanki gözləyirlər, faciə baş versin, sonra hərəkətə keçsinlər”.
Vətəndaşın iddiasına görə, bütün bunlar azmış kimi, Quba Su Meliorasiya Sistemlərinin İstismarı İdarəsi hər il bir neçə dəfə quyunu təmizləyir və tullantıları daşımaq əvəzinə onun evinin qarşısına tökür.
“Elə bil ki, mənim evim zibilxanadır. Müraciətlərim isə qulaqardına vurulur, cavabsız qalır. Bu sadəcə səhlənkarlıq deyil, insan həyatına, vətəndaş hüquqlarına qarşı açıq hörmətsizlikdir”.
