Quba və Kəlbəcərdə çay yataqlarından qanunsuz çınqıl-qum götürülməsi faktları aşkarlanıb.
Shimal.News xəbər verir ki, Dövlət Ekoloji Təhlükəsizlik Xidməti tərəfindən keçirilən nəzarət tədbirləri zamanı iki rayonda çınqıl-qum qarışığının qanunsuz yolla götürülməsi faktı müəyyən edilib.
Araşdırmalar nəticəsində məlum olub ki, Quba rayonunun inzibati ərazisində, Pirsaatçay çayının Şamaxı rayonundan keçən hissəsinin sol sahilində fəaliyyət göstərən “Aztimont” ASC-yə məxsus karxanadan və Kəlbəcər rayonunun Çopurlu kəndi ərazisində “Makro 2000 Eğitim Teknolojileri İnşaat Taahhüt İç ve Dış Ticaret Anonim Şirketi”nin Azərbaycandakı filialı tərəfindən Lev çayının yatağından ümumilikdə 1208 kubmetr çınqıl-qum qarışığı qanunsuz şəkildə götürülüb.
Faktla bağlı adıçəkilən müəssisələrin məsul şəxsləri — karxananın iş icraçısı Fəzail Həsənov və şirkətin mühəndisi Bahri Bolat barəsində vəzifəli şəxs qismində protokol tərtib olunub və onlar inzibati qaydada məsuliyyətə cəlb ediliblər.
