Quba şəhərində “ArchiVision Camp 2 – 2025” gənclər düşərgəsi keçirilib. Layihə Gənclər və İdman Nazirliyi ilə Azərbaycan Memarlıq və İnşaat Universitetinin (AzMİU) Tələbə Gənclər Təşkilatının (TGT) tərəfdaşlığı çərçivəsində baş tutub. Üç gün davam edən düşərgədə tələbələrə innovativ təlimlər, yaradıcı sessiyalar, praktiki məşğələlər və sosial fəaliyyətlər təqdim olunub.
Shimal.News xəbər verir ki, düşərgə proqramı zəngin və çoxşaxəli məzmunu ilə diqqət çəkib. Düşərgədə bir çox təlimlər təşkil olunub, günün sonunda isə tələbələr futbol, stolüstü tennis və voleybol üzrə keçirilən idman yarışlarında iştirak edərək bir-biriləri ilə daha yaxından tanış olublar və düşərgənin sosial mühitində fəal şəkildə yer alıblar.
İkinci gün təlimlərdən sonra keçirilən HAKATON mərhələsi düşərgənin kulminasiya nöqtəsinə çevrilib. Tələbələr “Gələcəyin dayanıqlı şəhəri”, “Smart Kampus” və “Kəndin rəqəmsal inkişafı” kimi mövzular ətrafında komandalarla işləyərək ideyalar formalaşdırıb. Konseptual təqdimatlar hazırlayan komandalar innovativ yanaşmalarını münsiflər heyətinə təqdim ediblər. Layihələr funksionallıq, sosial fayda, dayanıqlılıq və texnoloji tətbiq baxımından qiymətləndirilib.
Hakatonun sonunda komandalar ideyalarını münsiflər heyətinə təqdim edərək bir-biri ilə yarışıblar. Münsiflər təqdim olunan layihələri yenilikçilik, praktiklik, sosial fayda və təqdimat bacarığı baxımından dəyərləndiriblər. Bu mərhələ tələbələrin təqdimat bacarıqlarının və komanda işinin inkişafına xüsusi töhfə verib.
Günün sonunda isə “Marshmallow və concept party” təşkil olunub. Axşam əyləncəsi tələbələr üçün düşərgənin gərgin və məhsuldar gününü yaddaqalan bir atmosferlə tamamlayıb.
Düşərgənin üçüncü günü səhər idmanı ilə başlayıb, ardınca rəsmi bağlanış və mükafatlandırma mərasimi təşkil olunub. Fərqlənən iştirakçılar müxtəlif nominasiyalar üzrə təltif olunublar.
Mərasimdə Hakaton mərhələsində fərqlənən komandalar xüsusi diqqət mərkəzində olub. Münsiflərin qiymətləndirməsi əsasında I, II və III yerlərə layiq görülən komandalar xüsusi mükafatlarla təltif olunub, onların təqdim etdiyi layihələr innovativlik, dayanıqlılıq və sosial fayda baxımından yüksək dəyərləndirilib.
Son olaraq təşkil olunan Quba şəhər turu tələbələrin regionun tarixi və mədəni irsi ilə tanışlığına imkan yaradıb. Tələbələr Qırmızı Qəsəbədə dünyanın ən qədim dağ yəhudi icmalarından birinin həyat tərzi ilə tanış olub, Dağ Yəhudiləri Muzeyini və Quba Rayon Tarix-Diyarşünaslıq Muzeyini ziyarət ediblər. Tur Quba Soyqırımı Memorial Kompleksi ilə yekunlaşıb, burada iştirakçılar Azərbaycan tarixinin faciəli səhifələrinə nəzər salıblar.
