Qubanın Dəvədəbanı yaşayış massivində ailə münaqişəsi zamanı qadın xəsarət alıb.
Demokrat.az-ın məlumatına görə, hadisə iyulun 17-də baş verib.
34 yaşlı Əbdül şəxsi münasibətlər zəminində yaranan mübahisə zamanı həyat yoldaşı Əfsanəni (adlar şərtidir) əlindəki planşetlə (mobil cihaz) baş nahiyəsindən bir neçə dəfə vurub.
Faktla bağlı ona Cinayət Məcəlləsinin 128-ci (qəsdən sağlamlığa zərər vurma) maddəsi ilə ittiham elan olunub. Məhkəmədə Əbdül özünü təqsirli bildiyini deyib və son vaxtlar aralarındakı münaqişələrin artdığını qeyd edib.
Zərərçəkmiş Əfsanə də illərdir zorakılığa məruz qaldığını, lakin ailəsinə görə dözdüyünü bildirib. Hadisədən sonra o, ərinin hərəkətinə “yaxşı edib döymüşəm” deməklə cavab verdiyini söyləyib.
Əfsanə ifadəsinin sonunda ərini bağışladığını və şikayətinin olmadığını bildirib. O, qarşılıqlı razılaşma ilə nikahın pozulması üçün məhkəməyə müraciət edəcəyini də qeyd edib.
Quba Rayon Məhkəməsi tərəflərin barışmasını nəzərə alaraq cinayət təqibinə xitam verib.
