Quba rayonunda ər-arvad arasında yaşanan mübahisə cinayətlə nəticələnib.
Demokrat.az-ın məlumatına görə, avqustun 13-də 33 yaşlı Xəlil evdə baş verən mübahisə zamanı həyat yoldaşı Süsənə (adlar şərtidir – red.) əl-qolla xəsarət yetirib. O, qadının üz nahiyəsinə yumruq, sol ayağına isə təpik zərbəsi vurub.
Hadisədən sonra Xəlilə Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə ittiham irəli sürülüb. Məhkəmədə ifadə verən təqsirləndirilən şəxs ittihamı qəbul edərək əməlindən peşman olduğunu bildirib. O, 13 ildir evli olduqlarını və iki övladlarının olduğunu qeyd edib, son vaxtlar ailədə gərginlik yarandığını deyib.
Quba Rayon Məhkəməsində araşdırma zamanı məlum olub ki, tərəflər barışıb və zərərçəkmiş ərinə qarşı şikayətini geri götürüb.
Nəticədə məhkəmə Cinayət Məcəlləsinin 73.2-ci maddəsinə əsasən cinayət təqibinə xitam verib və Xəlil cinayət məsuliyyətindən azad edilib.
