Qubada 26 yaşlı gəncin qətlində təqsirləndirilən Murad Abbasovun cinayət işi üzrə məhkəmə prosesi yekunlaşıb.
ShimalNews “Apa”-ya istinadən xəbər verir ki, bu gün Sumqayıt Ağır Cinayətlər Məhkəməsində hakim Nurəddin Hüseynlinin sədrliyi ilə keçirilən iclasda hökm elan olunub.
Hökmə əsasən, Murad Abbasov 12 il müddətinə azadlıqdan məhrum edilib.
Quba Rayon Prokurorluğunun məlumatına görə, ötən il iyunun 2-si saat 1:00 radələrində 26 yaşlı Rəhman Rəhmanovun xəstəxanada ölməsi barədə prokurorluğa məlumat daxil olub. İlkin araşdırma zamanı 28 yaşlı Murad Abbasov aralarında yaranmış mübahisə zamanı Rəhman Rəhmanova kəsici-deşici alətlə xəsarətlər yetirərək qəsdən öldürməsinə əsaslı şübhələr müəyyən edilib.
Faktla bağlı Quba Rayon Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb və Abbasov Murad Rza oğlu şübhəli şəxs qismində tutularaq istintaqa cəlb edilmişdir.
