Qubada nanokompozitlər əsasında yeni gübrələrin alınma sahəsində elmi institutlar arasında müqavilə imzalanıb. Bu barədə ShimalNews 17 fevral tarixində Meyvəçilik və Çayçılıq Elmi-Tədqiqat İnstitutuna istinadən məlumat verir.
Müdafiə Sənayesi Nazirliyi Milli Aerokosmik Agentliyinin (MAKA) Ekologiya İnstitutunun direktoru Bəhram Əliyevin rəhbərlik etdiyi nümayəndə heyəti Meyvəçilik və Çayçılıq Elmi-Tədqiqat İnstitutuna səfər edib.
Qonaqlara institutun fəaliyyəti və icra edilən layihələr haqqında ətraflı məlumat direktor İlham Qaraqurbanlı tərəfindən təqdim edilib. Eyni zamanda 2 institut arasında elmi-texniki işlərin aparılmasına dair müqavilə imzalanıb.
Müqavilənin imzalanmasında məqsəd nanokompozitlər əsasında yeni gübrələrin alınma texnologiyasının meyvəçiliyə tətbiqi və nanohissəciklərin meyvə bitkilərinin inkişafına təsirinin qiymətləndirilməsi sahəsində tədqiqatların aparılmasıdır.
Daha sonra MAKA Ekologiya İnstitutunun nanotexnoloji şöbəsinin rəis müavini Ceyran Sultanova və həmin şöbənin elmi işçisi Lamiyə İsmayılova nanotexnoloji tədqiqatlar və onların alma bitkisinin məhsuldarlığına təsirinin tədqiqi mövzusunda çıxış ediblər.
Sonda elmi işçiləri maraqlandıran suallar ətrafında müzakirələr aparılıb.
