Yəhudilər Roş-Ha-Şana bayramını təntənəli şəkildə qeyd etməyəcəklər. Bu barədə ShimalNews 26 sentyabr tarixində Bizim.media-ya istinadən məlumat verir.
“Bu il qeyd etməməyimizin səbəbi sentyabrın 12-14 ermənilərin Azərbaycana qarşı təxribatı nəticəsində şəhid olan 81 igidimizin əziz xatirəsi və 27-sentyabr - Anım günü ilə bağlıdır.
Biz Azərbaycan vətəndaşlarıyıq, burda yaşayırıq. Vətən Müharibəsində 3 minə yaxın, son erməni təxribatında 81 şəhid verən Azərbaycanın kədəri həmişə bizim kədərimiz olub, sevinci də sevincimiz.
Ona görə də yeni il bayramını adi qaydada ancaq öz evlərimizdə qeyd etməyi qərara almışıq, hər hansı kütləvi tədbir keçirməyəcəyik”, - deyə Quba İH başçısının Qırmızı Qəsəbə İnzibati Ərazi Dairəsi üzrə nümayəndəsi Telman Mixailov məlumat verib.
Ötən gündən başlayaraq dünya yəhudiləri Roş-Ha-Şana bayramını qeyd edir və 10 gün davam edəcək. Qubada sinaqoqlar açıq olacaq, lakin kütləvilik olmayacaq.
