Əməkdar həkim Cabir Məmmədov komadadır və hazırda süni tənəffüs aparatına qoşulub.
Milli.аz-ın məlumatına görə, o, “Baku Medical Plaza"nın reanimasiya şöbəsinə yerləşdirilib.
Həkimin oğlu, Rəşad Cabirli xəbəri təsdiqləyərək, atasının şəkər xəstəliyi və xroniki böyrək çatışmazlığından əziyyət çəkdiyini, bu səbəbdən vəziyyətinin xüsusi diqqət tələb etdiyini bildirib.
O qeyd edib ki, hazırda həkimlər atasının komadan çıxması üçün səy göstərirlər:
"Artıq bir həftəyə yaxındır ki, atam reanimasiyadadır və həkimlərin ciddi nəzarəti altındadır".
Xatırladaq ki, bir neçə ay əvvəl tanınmış ürək həkimini avtomobil vurub.
Məlumat üçün bildirək ki, Quba Rayon Mərkəzi Xəstəxanasının Ümumi Terapiya Şöbəsinin keçmiş müdiri olan Məmmədov Cabir İsrafil oğlu 1950-ci ildə anadan olub. O, 1984-1985-ci illərdə Quba rayonu Alpan kənd xəstəxanasında həkim kimi çalışıb, 1985-1996-cı illərdə Quba RMX-da həkim-kardioloq, 1996-2023 illər ərzində Ümumi Terapiya şöbəsinin müdiri kimi fəaliyyət göstərib.
1988-ci ildə Moskvada keçirilən Həkimlərin Ümumittifaq Qurultayında Azərbaycanı təmsil edib, Ali ixtisas dərəcəsi alıb, "SSRİ səhiyyə əlaçısı" döş nişanı ilə təltif edilib.
2013-cü ildə Prezident İlham Əliyevin sərəncamına əsasən "Tərəqqi" medalı ilə təltif edilən C.Məmmədov, 2018-cü ildə Prezidentin Sərəncamına əsasən "Əməkdar həkim" fəxri adına layiq görülüb.
