Quba Rayon Mərkəzi Xəstəxanasının Hemodializ şöbəsində xəstələrin və tibb heyətinin uzun müddət təmiz havaya həsrət qalması problemi nəhayət ki, həllini tapdı. Bu məsələnin gündəmə gəlməsində və ictimaiyyətin diqqətinə çatdırılmasında Shimal.News-un rolu olub.
Xatırladaq ki, bir müddət əvvəl xəstəxananın Hemodializ şöbəsində müalicə alan xəstələr və tibb işçiləri şöbənin pəncərələrinin nasaz olması ilə bağlı rəhbərliyə müraciət etmişdi. Lakin problemin həlli gözlənildiyi kimi olmadı. Pəncərələri təmir etmək əvəzinə onları vintlə bağladılar. Nəticədə xəstələr və tibb işçiləri havasız, ağır şəraitdə işləməyə və müalicə almağa məcbur qaldılar.
Bu barədə məsələni ictimaiyyətə çatdıran Shimal.News bu haqda geniş reportaj hazırladı və problemi işıqlandırdı. Medianın bu təşəbbüsü sayəsində məsələ diqqət mərkəzinə düşdü və xəstəxana rəhbərliyi nəhayət ki, pəncərələrin təmir olunmasına qərar verdi. Artıq şöbədə təmiz hava axını bərpa edilib, xəstələr və tibb personalı normal şəraitdə fəaliyyət göstərə bilirlər.
Bu hadisə bir daha göstərir ki, media və ictimai nəzarət cəmiyyətin problemlərinin həllində güclü təsir gücünə malikdir. Shimal.News bu təşəbbüsü ilə sübut etdi ki, jurnalistika təkcə məlumat yaymaq deyil, həm də real dəyişikliklərə səbəb olmaq gücünə sahibdir.
