Quba və Qusar rayonlarından çınqıl-qum qarışığının qanunsuz daşınması faktları aşkarlanıb.
Shimal.News xəbər verir ki, bu barədə Dövlət Ekoloji Təhlükəsizlik Xidməti məlumat yayıb.
Nəzarət tədbirləri zamanı müəyyən olunub ki, Göygöl rayonu Yeni Zod kənd sakini Teymur Hacıyev Göygöl rayonunun inzibati ərazisindən, Fəxrəddin İsayevə məxsus qum-çınqıl karxanası Qusarçay çayının Qusar rayonundan keçən hissəsindən, həmçinin "Dəmiryol Tikinti" MMC Qudyalçay çayının Quba rayonunun inzibati ərazisindən keçən hissəsindən ümumilikdə 1202,4 m3 həcmində çınqıl-qum qarışığını qanunsuz olaraq götürüblər.
Faktlarla bağlı Teymur Hacıyev və Fəxrəddin İsayevə məxsus qum-çınqıl karxanasının iş icraçısı Şaiq Teymurov barəsində vəzifəli şəxs qismində, "Dəmiryol Tikinti" MMC-nin məsul şəxsi Talıb Mehdiyev barəsində isə fiziki şəxs qismində protokol tərtib olunub və qanunamüvafiq qaydada inzibati məsuliyyətə cəlb ediliblər.
