Azərbaycan İdman Akademiyasının (AİA) İngilis dili üzrə Hazırlıq kursu tələbəsi, Mozambik vətəndaşı Yvie Natalia Macave “Müxtəliflik və bərabərlik: İnklüziv gələcəyin qurulması” adlı XVI Beynəlxalq Multikulturalizm Məktəbində iştirak edib.
Shimal.News xəbər verir ki, Bakı Beynəlxalq Multikulturalizm Mərkəzinin (BBMM) təşkilatçılığı ilə keçirilən Məktəb Bakı şəhəri ilə yanaşı Quba və Qusar rayonlarında da fəaliyyət göstərib.
XVI Beynəlxalq Multikulturalizm Məktəbində Azərbaycan, Rusiya, Bolqarıstan, Braziliya, Serbiya, Rumıniya, Özbəkistan, Qazaxıstan, Gürcüstan, İraq, Mozambik, Moldova, Türkiyə, Yaponiya, Polşa, Cənubi Koreya, Zimbabve, Çin, Yəmən, Pakistan və Mərakeşdən olan 25 tələbə iştirak edib.
Məktəb iştirakçıları xalqımızın Ümummilli Lideri, müasir müstəqil Azərbaycan dövlətinin memarı və qurucusu Heydər Əliyevin məzarını, Şəhidlər xiyabanını ziyarət ediblər. Həmçinin iştirakçılar Quba Soyqırımı Memorial Kompleksi, Qırmızı qəsəbə, Dağ Yəhudiləri Muzeyi ilə tanış olublar, “Giləki” sinaqoqunu ziyarət ediblər. Bundan əlavə qonaqlar Heydər məscidində, Rus Pravoslav və Müqəddəs Məryəm Katolik kilsələrində, Tolerantlıq Evində olublar.
Beynəlxalq Multikulturalizm Məktəbi çərçivəsində “Öz xalqını təqdim et” adlı musiqili axşamlar da təşkil olunub. Burada iştirakçı tələbələr öz xalqlarının mədəniyyəti, adət ənənələri ilə bağlı məlumat veriblər.
Bağlanış mərasimində məktəb iştirakçılarına sertifikatlar təqdim olunub.
