Qubada yerləşən Meyvəçilik və Çayçılıq Elmi-Tədqiqat İnstitutunda (ETİ) toxumçuluq, şitilçilik və tingçilik üzrə mütəxəssislər hazırlanacaq. Bu barədə ShimalNews 28 fevral tarixində Azərtac-a istinadən məlumat verir.
İnstitut və Bakı Peşə Hazırlığı Mərkəzi arasında əməkdaşlıq müqaviləsi imzalanıb. İşsiz və işaxtaran şəxslərə “Peşə təhsili müəssisəsi”nin müəyyən etdiyi qaydada təlim-tədris dərslərinin keçirilməsi və maarifləndirilməsi nəzərdə tutulub.
İlkin mərhələdə kursa 12 müdavim seçilərək cəlb edilib. Onlara 2 ay müddətində yeni hazırlanmış təlim modulundan istifadə edilməklə dərslər keçiriləcək.
İlk gündə kurs haqqında ümumi məlumat, nəzəri və praktiki dərslərin ardıcıllığı, davamiyyət, təhlükəsizlik qaydaları haqqında məlumat verilib. Müdavimlər praktiki dərslərin keçiriləcəyi laboratoriya, iqlim otaqları və istixana ilə tanış olublar.
Tədrisi müvəffəqiyyətlə bitirənlərə peşə sertifikatları təqdim ediləcək. Fərqlənənlər isə işlə təmin olunacaqlar.
