Qubada dövlət məmurunun ailəsini öldürməyə cəhd olunub. Bu haqda ShimalNews 15 dekabr tarixində Report-a istinadən məlumat verir.
Qəçrəş bələdiyyəsinin sədri vəzifəsini icra edən Vüqar Kərimovun ailə üzvləri Könül Hüseynova, Səlimə Kərimova, Kərim Kərimov və İlhamə Kərimovanın üzərinə avtomobil sürülüb. Onlar müxtəlif dərəcəli bədən xəsarətləri alıblar, kənd sakinlərinin müdaxiləsi nəticəsində cinayətkar öz əməllərini başa çatdıra bilməyib.
Cari il avqustun 26-da baş vermiş hadisə ilə bağlı rayon prokurorluğunda cinayət işinin istintaqı yekunlaşıb. Aparılan istintaqla rayonun Qımılqazma kənd sakini Aydın Şahverdiyevin istifadəsində olan torpaq sahəsini sənədləşdirmək istədiyi məlum olub. Vüqar Kərimovun ona köməklik etməyəcəyini başa düşdükdən sonra Şahverdiyevin ondan qisas almaq məqsədilə idarə etdiyi avtomobili məmurun ailəsinin üzərinə sürməyinə dair əsaslı şübhələr müəyyən edilib.
Cinayət işi baxılması üçün Sumqayıt Ağır Cinayətlər Məhkəməsinə göndərilib.
