Kazan Dövlət Aqrar Universitetinin nümayəndələri Qubaya səfər ediblər. Bu haqda ShimalNews 25 noyabr tarixində Meyvəçilik və Çayçılıq Elmi-Tədqiqat İnstitutuna istinadən məlumat verir.
Görüşdə Meyvəçilik və Çayçılıq Elmi-Tədqiqat İnstitutunun direktoru İlham Qaraqurbanlı, elmi işlər üzrə direktor müavini Sevil Süleymanova, Quba Regional Aqrar Elm Mərkəzinin direktoru İslam Bəyəhmədov, Kazan Dövlət Aqrar Universitetinin rektoru Ayrat Rasimoviç Vəliyev, Meşə təsərrüfatı və ekologiya fakültəsinin dekanı Renat Xalitoviç Qafiyatov, Meşə təsərrüfatı və meşə plantasiyaları kafedrasının professoru Xaris Qaynutdinoviç Musin iştirak ediblər.
Qonaqlara institutun fəaliyyəti, icra olunan layihələr, laboratoriya və istixananın fəaliyyət istiqamətləri haqqında ətraflı məlumat verilib.
İnstitutda fəaliyyət göstərən mikroklonal çoxaltma laboratoriyası, istixana kompleksi, yeni fəaliyyətə başlayan molekulyar biologiya laboratoriyasında müvafiq cihaz və qurgular, onların iş prinsipi, yeni metod və üsullarla tanışlıq həyata keçirilib.
Görüşdə, eləcə də kənd təsərrüfatı sahəsində elmi tədqiqatların aparılması, aqrar sahədə mütəxəssis hazırlığı ilə bağlı qarşılıqlı təcrübə və əməkdaşlıq perspektivləri müzakirə olunub.
Sonra tədqiqat və innovasiya fəaliyyətinin inkişafı, birgə tədqiqat layihələrinin hazırlanması və həyata keçirilməsi, elmi məlumat mübadiləsi, təcrübə və ixtisasartırma kurslarının təşkili yolu ilə kadrların hazırlanması üzrə əməkdaşlıq memorandumu imzalanıb.
