Erməni vəhşiliyinin əyani və canlı sübutu olan Quba Soyqırımı Memorial Kompleksinin yenilənməyə ciddi ehtiyacı var.
Bizim.Media-nın məlumatına görə, yağış yağanda muzeyə su damır. Bu səbəbdən divarlar həm içəridən, həm də çöl hissədən bərbad vəziyyətə düşüb. Üstəlik, çıxış hissəsində beton divarın aralandığı da diqqət çəkir.
Mədəni İrsin Qorunması, İnkişafı və Bərpası üzrə Dövlət Xidmətinin rəisi Səbinə Hacıyeva 1 il öncə bərpa işlərinin aparılacağını bildirib. Amma kompleksdə hələ də təmir-bərpa işlərinə başlanılmayıb.
Bu dəfə xidmətin mətbuat katibi Fariz Hüseynli təmir işlərinin cari ildə aparılacağını bildirib. Onun sözlərinə görə, müvafiq prosedurlara başlanılıb.
Quba Soyqırımı Memorial Kompleksi 1918-ci ildə ermənilərin Quba qəzasına basqını zamanı vəhşicəsinə öldürülən və quyulara qalaqlanan on minlərlə dinc insanın xatirəsinə ucaldılıb. Fəaliyyətə başladığı gündən indiyədək 1 milyondan çox insanın ziyarət etdiyi kompleks Qudyalçayın sahilində yerləşməsi səbəbindən tədricən yararsız vəziyyətə düşməyə başlayıb.
