Quba şəhərinin Lütfizadə və Əziz Əliyev küçələrində yaşayan sakinlər “Quba Şahdağ Truskavets” sanatoriyasından narazılıq edirlər.
Məsələ ilə bağlı Shimal.News-a danışan sakinlər bildirirlər ki, sanatoriyanın xüsusi parklanma yeri olmadığından, qonaqlar avtomobillərini onların evlərinin qarşısında saxlayırlar.
Bu isə sakinləri narahat edir. Eyni zamanda, axşam saatlarında olan səs-küy onların istirahətlərinə də mane olur.
Şikayətlərlə bağlı sözügedən istirahət mərkəzinin direktoru ilə də əlaqə saxladıq. Direktor Qəmbər Rəhimlinin sözlərinə görə, gələn qonaqların maşınları, əsasən, sanatoriyanın qarşısında saxlanılır:
“Bəzi hallarda 1-2 qonaq sakinlərin evlərinin qarşısında maşın saxlaya bilər. Belə hallarda dərhal müdaxilə edib avtomobili başqa yerə yönləndiririk. Əgər sakinlər bizə müraciət etsələr, məsələni dərhal yerində həll edərik.
Digər məsələyə gəldikdə isə, hansı səs-küydən söhbət gedir? Sadəcə olaraq hər gün saat 10-a qədər canlı musiqi olur”,- deyə o əlavə edib.
