Quba rayonunun Alekseyevka kəndində 63 yaşlı Bədiyar Babayevə məxsus fərdi yaşayış evində partlayış və ardınca yanğın baş verib.
Shimal.News xəbər verir ki, alov qısa zamanda yeni inşa edilən birmərtəbəli evə yayılıb. Dərhal əraziyə Fövqəladə Hallar Nazirliyinin yanğınsöndürmə briqadaları cəlb olunub. Alov söndürülüb, yanğının daha geniş ərazilərə yayılmasının qarşısı alınıb. Ümumi sahəsi 80 kv.m. olan birmərtəbəli fərdi yaşayış evinin 40 kv.m.-i tamamilə yanıb.
Partlayış nəticəsində ev sahibəsi 62 yaşlı Qərənfil Babayeva müxtəlif dərəcəli xəsarətlər alıb. Quba Mərkəzi rayon Xəstəxanasına yerləşdirilən yaralıya üzün, hər iki əlin və sağ diz oynağinin I-II dərəcəli termiki yanığı (10%) diaqnozu təyin olunub. Ona zəruri tibbi yardımlar göstərilib və hazırda müalicəsi davam etdirilir. Vəziyyəti orta ağır qiymətləndirilir.
Ev sahibinin oğlu Xəyyam Babayev bildirib ki, yanğın partlayışdan bir müddət sonra başlayıb. Partlayış nəticəsində yaralanan anası Q.Babayevanı xəstəxanaya aparıb hadisə yerinə qayıdandan sonra evdə alışma baş verib:
- “Anamı xəstəxanaya apardım. Sonra qonşuların köməyi ilə “Qazel” maşını həyətdən çıxardıq. Maşını çıxarandan sonra ev alışmağa başladı. Fövqəladə Hallar Nazirliyinə zəng vurduq, gəlib evi söndürdülər. Partlayış ana xəttdən qaz sızmasından baş verib. Evdə yaşayış yoxdur.”
Hadisə şahidi, zərərçəkənlərin qonşusu Taleh Babayev də hadisənin qaz sızması nəticəsində baş verdiyini bildirib:
- “Saat 08:40-da partlayış oldu. Həyətə qaçdıq. Üzbəüz qonşuyuq. Gördük ki, qonşu qadın xəsarət alıb. Evin qarşısından qaz xətti keçir. Vladimirovka, Zizik kəndlərinə gedən böyük qaz xəttidir. Orada yerin altından qaz fısqırırdı. Torpaqdan qaz çıxırdı. Çox güman ki, oradan sızan qaz zirzəmiyə dolub. Qadın işığı yandıranda partlayış olub. Amma heç bir yanğın yox idi. Yanğın sonradan başladı. FHN əməkdaşları gəlib söndürdü. Partlayış vaxtı evdə ana və qızı olub.
Partlayış zamanı evin yaxınlığında olan Babayevlərə məxsus olan “Qazel” markalı nəqliyyat vasitəsinə də ziyan dəyib. Quba rayon Fövqəladə Hallar Komissiyasının və digər qurumların əməkdaşları hadisə yerinə baxış keçirib. Hadisənin baş vermə səbəbləri və dəyən ziyan araşdırılır. Partlayış və yanğın baş verən kürsülü fərdi yaşayış evində yaşayış olmayıb. Babayevlər evlərini yeni təmir ediblər, hələ ki, həyətdəki köhnə tikilidə yaşayırlar.
Faktla bağlı araşdırmalar davam etdirilir.
View this post on Instagram
