Bakı metrosunun “Nizami” stansiyası qarşısında xuliqanlıq hərəkətləri edən şəxs həbs edilib.
Qafqazinfo.az-ın məlumatına görə, fevralın 20-si Quba rayon sakini 49 yaşlı E.Mehdiyev (şərti soyadlı) sərxoş halda stansiyaya daxil olmağa çalışıb.
Həmin şəxsi metronun girişində xidmət aparan polislər içəri buraxmayıb. Daha sonra o, insanların sıx olmasından istifadə edərək növbəti dəfə stansiyaya daxil olmaq istəyib və yenidən oradan kənarlaşdırılıb.
Bundan sonra E.Mehdiyev insanların kütləvi hərəkət etdiyi metro stansiyasının qarşısında təbii ehtiyacını ödəməyə başlayıb. O, saxlanılaraq polis idarəsinə aparılıb və ekspertizadan keçirilib. Müəyyən olub ki, əməli törədən şərxoşdu və onun barəsində protokol tərtib edilib.
Protokolla birgə Yasamal Rayon Məhkəməsinə göndərilən E.Mehdiyev ifadəsində törətdiyi əməli etiraf edib. O, ac qarına 1 litr araq içdiyini bildirib.
Yasamal Rayon Məhkəməsinin qərarı ilə E.Mehdiyevə 25 sutka inzibati həbs verilib.
