Quba rayonunun Yeni Güləzi kəndində yerləşən evdə yaşayan sakin təhlükəli şəraitdən şikayətçidir.
“Heç bir qurum səsimə səs vermir. FHN deyir bu, icra hakimiyyətinin işidir. İcra hakimiyyəti qaz idarəsini göstərir. Bu idarə də cavab verir ki, qaz xəttinin üstündə ev tikmisiniz”, – deyə Salaməddin Hüseynov Shimal.News-a bildirib.
Haput kənd sakini Salaməddin Hüseynov torpaq sürüşməsi nəticəsində doğma kəndini tərk etməyə məcbur qalıb. Ona 2022-ci ildə Yeni Güləzidə fərdi yaşayış evi verilib. Evin tikintisinə 2016-2017-ci illərdə başlanılıb. 5 il ərzində inşa işləri aparılmasına baxmayaraq evdə nə qaz, nə su, nə də sanitar qovşaq var.
Salaməddin Hüseynov həyətində tualet və hamam tikmək üçün qazıntı işləri apararkən böyük diametrli və yüksək təzyiqli qaz xəttinə rast gəlib. Əraziyə baxış keçirən “Azəriqaz” əməkdaşları xəttin doğrudan da yüksək təzyiqli olduğunu təsdiqləyiblər.
Sakinin sözlərinə görə o, “Azəriqaz”a, Fövqəladə Hallar Nazirliyinə (FHN) və yerli icra hakimiyyətinə müraciət etsə də, məsələnin həlli yolu tapılmayıb. Qurumlar məsuliyyəti bir-birinin üzərinə atır.
Evə dair mülkiyyət sənədi də bu günə kimi vətəndaşa təqdim olunmayıb. Bu səbəbdən o, hüquqi addımlar da ata bilmir. Özünü “bombanın üstündə oturdulmuş kimi” hiss etdiyini deyən S.Hüseynov, ailəsinin həyatı üçün narahatdır və qaz xəttinin ərazidən kənarlaşdırılmasını tələb edir.
