Quba Rayon Mərkəzi Xəstəxanasının Hemodializ şöbəsində tibbi sterilizasiya qaydalarına riayət olunmaması xəstələrin həyatı üçün ciddi təhlükə yaradır. Xroniki böyrək çatışmazlığından əziyyət çəkən və mütəmadi dializ seanslarına ehtiyacı olan insanlar infeksiya riski ilə qarşı-qarşıya qalıblar.
Xəstələrin verdiyi məlumata görə, şöbədə istifadə olunan tibbi avadanlıqların sterilizasiyası aparılmır. Bu isə xəstələrin müxtəlif infeksiyalara yoluxma ehtimalını artırır.
Məsələ ilə bağlı Shimal.News -a danışan xəstələrdən biri bildirir ki, dəfələrlə rəhbərliyə şikayət etsələr də, problemlər həll olunmur:
"Burada vəziyyət ürəkaçan deyil. Sterilizasiya qaydalarına əməl olunmur. Əgər bu, belə davam edərsə, xəstələrin vəziyyəti daha da pisləşəcək. Biz müalicə üçün gəlirik, amma infeksiya təhlükəsi ilə üzləşirik".
Bundan əvvəl Shimal.News Hemodializ şöbəsində pəncərələrin vintlə bağlanması ilə bağlı xəbər yayımlamışdı. Sonra məsələ həll olunsa da, şöbədəki əsas problem – sterilizasiya və sanitar-gigiyenik qaydaların pozulması hələ də qalmaqdadır.
Tibb sahəsi üzrə ekspertlərin fikrincə, dializ xəstələri üçün infeksiyadan qorunma xüsusi əhəmiyyət daşıyır. Çünki onların immun sistemi zəiflədiyindən, ən kiçik bakterial infeksiya belə ciddi fəsadlara yol aça bilər.
Bu xəstələrin həyatını qorumaq üçün daha neçə xəbər yazılmalıdır? Daha neçə insan sağlamlığını itirməlidir ki, sistem işləməyə başlasın?
Mövzu ilə bağlı araşdırmalarımız davam edir.
